याचना
➖
रखरखत्या रवीगोलास
इवलीशी विचारे मुंगी
जरी देशी दाह जगाला
लाही न माझिया अंगी
◽️
किती जीव जन्मती जगती
मग कशास क्षणभर तंटा
हे रौद्र अदित सम्राटा
अम्ही क्षुल्लक तू वरवंटा
◽️
तू भले सोड त्या ज्वाळा
कापेल त्राहीं ही धरिणी
व्याघ्राची भीती लांघुनिया
चरण्यासी निघेल हरिणी
◽️
विश्वाच्या विशाल उदरी
बहू कृमी, जंत अन पाणी
दीप्तीने तुझ्याच उजळोनी
झाडांस बिलगतील गाणी
◽️
दूरवरुनी फुलव निखारे
वा अवचित दे जलधारा
सुक्ष्मात जवळ घे वसुधा
बघ वारुळ विभ्रम सारा
◽️
तू अजस्र खग किरणांनी
घे उचल पृथ्वीचा मोहर
मग टिपेल चंद्र बिलोरी
वैशाखी तमस मनोहर
◽️
तू अधिपती सृष्टी दिठीचा
मी क्षुद्र टिंब सरपटते
नमनासी वाहुनी साखर
प्रार्थनी क्षेम पुटपुटते…
◽️
- श्रीपाद अपराजित
No comments:
Post a Comment